Egnatia me short “me fat” në Champions League, do të përballet me Petrocub Hîncești
Ndërsa bota e futbollit po ndjek me interes ndeshjet e Kupës së Botës 2026 në Meksikë, SHBA dhe Kanada, vëmendja në Evropë është kthyer edhe nga hedhja e shortit për turin e parë kualifikues të UEFA Champions League për sezonin 2026-2027.
Në ceremoninë e zhvilluar në Zyrih të Zvicrës, kampionia e Shqipërisë, Egnatia, ka mësuar kundërshtarin e saj. Klubi rrogozhinas do të përballet me skuadrën moldave Petrocub Hîncești.
Ky short konsiderohet gjerësisht si një mundësi e mirë për Egnatian, pasi goglat shmangën kundërshtarë me një profil më të lartë apo me më shumë eksperiencë në kompeticionet evropiane, si Kairat, Craiova, Drita e Gjilanit, Borac apo Vikingur, të cilët ishin pjesë e grupit të skuadrave të mundshme përballë kampionëve shqiptarë.
Takimi i parë mes Egnatias dhe Petrocub Hîncești është planifikuar të luhet në transfertë në Moldavi, më 7 ose 8 korrik. Ndeshja e kthimit, e cila do të përcaktojë kalimin në turin tjetër, do të zhvillohet në Rrogozhinë, në shtëpinë e Egnatias, më 14 ose 15 korrik.
Ndërkohë, Drita e Gjilanit, një tjetër përfaqësuese nga trevat shqiptare, do të ketë një sfidë më delikate. Skuadra nga Kosova do të masë forcat me Kauno Žalgiris nga Lituania, në atë që pritet të jetë një duel më i vështirë.