Rama ironizon akuzat për të infiltruar në protestë: “Flamingot do të habiten si ranë mes korbave të shqiptarisë së rreme”
Kryeministri Edi Rama ka reaguar me ironi këtë të diel pas deklaratave të një prej organizatorëve të protestës së fundit, i cili ngriti pretendime për persona të infiltruar në lidhje me incidentin e flamurit të Izraelit.
Nëpërmjet një postimi në rrjetet sociale, kreu i qeverisë vuri në pikëpyetje sinqeritetin e deklaratës së Arben Kolës, një prej organizatorëve, duke pyetur retorikisht: “Po ky vetë?”. Kjo vjen pas shpjegimeve të Kolës se incidenti me flamurin izraelit gjatë manifestimit ishte vepër e individëve të infiltruar, të cilët, sipas tij, synonin të dëmtonin imazhin e protestës.
Më tej, kryeministri vijoi me një metaforë të fortë, duke theksuar se “flamingot do të habiten me veten e tyre si ranë me kokë mes korbave e sorrave të shqiptarisë së rreme”. Kjo shprehje sugjeron një kritikë të thellë ndaj atyre që ai i konsideron si pjesë e një “shqiptarie të rreme” dhe që kanë ndikuar negativisht tek të tjerët.
Reagimi i Ramës lidhet drejtpërdrejt me zhvillimet rreth protestës së fundit, ku incidenti i ngritjes dhe djegies së flamurit të Izraelit ngjalli debat të gjerë publik dhe dënim nga qeveria.