Kryepiskopi Joan merr pjesë në Takimin Ndërkombëtar Historik të Paqes në Assisi
Fortlumturia e Tij, Joani, Kryepiskop i Tiranës, Durrësit dhe i Gjithë Shqipërisë, po merr pjesë në Takimin Ndërkombëtar të Paqes që zhvillohet në qytetin e Assisit, Itali. Ky event i rëndësishëm, i organizuar nga Komuniteti i Sant’Egidio, përkon me 40-vjetorin e nismës historike të nisur nga Papa Gjon Pali II në vitin 1986 dhe zgjat nga 25 deri më 27 tetor 2026.
Takimi, i cili ka temën “Paqe e çarmatosur dhe çarmatosëse”, mbledh primatë dhe udhëheqës fetarë nga e gjithë bota, personalitete të larta politike dhe kulturore, aktivistë të paqes dhe përfaqësues të shoqërisë civile nga 53 vende. Punimet e tij u hapën më 25 tetor 2026, me një mesazh të veçantë nga Presidenti i Republikës së Italisë, Shkëlqesia e Tij z. Sergio Mattarella.
Gjatë këtij takimi, Kryepiskopi Joan do të japë kontributin e tij duke referuar në dy forume. Temat e referateve të tij do të jenë “Uniteti i krishterë si udhëtim në të Vërtetën dhe Paqen” (nga një perspektivë orthodhokse) dhe “Martirët bashkëkohorë: dëshmitarë të mirësisë”.
Ceremonia përmbyllëse e Takimit Ndërkombëtar të Paqes do të mbahet më 27 tetor në Sheshin e Poshtëm të Bazilikës së Shën Françeskut, nga ku do të lëshohet një apel global për paqen.