Turqia pezullon të gjitha fluturimet drejt Iranit pas hyrjes në fuqi të sanksioneve të reja të SHBA-së
Kompanitë ajrore turke kanë ndërprerë të gjitha fluturimet drejt dhe nga Irani duke nisur nga dita e hënë. Ky veprim vjen si pasojë e hyrjes në fuqi të sanksioneve të reja të vendosura nga Shtetet e Bashkuara të Amerikës kundër sektorit të aviacionit iranian.
Sipas informacioneve të shfaqura në faqet e internetit të “Turkish Airlines” dhe “AJet”, fluturimet për në Iran nuk janë të disponueshme deri në mars të vitit 2027. Ndërkohë, “Pegasus” ka hequr itineraret për në këtë vend nga sistemi i saj i rezervimeve për një periudhë të pacaktuar. Një zëdhënës i “Turkish Airlines” theksoi se nuk ka asnjë garanci për rifillimin e fluturimeve pas afatit të marsit 2027.
Sanksionet e SHBA-së ndaj sektorit të aviacionit iranian janë vlerësuar si mjaft të ashpra, duke detyruar linjat ajrore turke të ndërmarrin këtë hap. Kufizimet priteshin për avionët e prodhuar në SHBA, siç janë ata të tipit Boeing. Megjithatë, sanksionet e reja shkojnë më tej, duke penguar përdorimin e avionëve Airbus për fluturimet drejt Iranit, për shkak se edhe këta përmbajnë komponentë të prodhuar në Shtetet e Bashkuara.
Që prej së hënës, “Mahan Air” është e vetmja linjë ajrore iraniane që nuk lejohet të fluturojë drejt Turqisë, për shkak të rrezikut që paraqesin sanksionet amerikane. Ndërkohë, kompanitë e tjera ajrore iraniane mund të vazhdojnë itineraret e tyre midis dy vendeve për momentin.
Ky zhvillim shënon një ndryshim të rëndësishëm, pavarësisht marrëdhënieve tradicionale dhe lidhjeve të gjera energjetike e tregtare mes Turqisë dhe Iranit. Ankaraja duket se po merr një qëndrim të ndryshëm pas vendimit të Presidentit të SHBA-së, Donald Trump, për të rritur presionin ekonomik mbi Teheranin.
Në kuadër të këtij presioni, gjatë fundjavës së kaluar, Turqia revokoi licencën bankare të Bankës Mellat të Iranit, e cila kishte operuar në vend prej dekadash. Po ashtu, javën e kaluar, rregullatori bankar i Turqisë mori kontrollin e “Golden Global Investment Bank”, pas vendosjes së sanksioneve të SHBA-së ndaj kësaj banke për dyshimet se kishte kanalizuar fonde për qeverinë iraniane.