Incident i rëndë në Ukrainën Perëndimore: Dron rus godet tren pasagjerësh, pak pas kalimit të Boris Johnson dhe zyrtarëve të lartë evropianë
Një incident i rëndë ka ndodhur së fundmi në Ukrainën perëndimore, ku një dron rus ka goditur një tren pasagjerësh pranë kufirit me Poloninë. Detaje të reja bëjnë me dije se sulmi ndodhi vetëm pak minuta pasi në të njëjtën linjë hekurudhore kishte kaluar një tren që transportonte ish-kryeministrin britanik, Boris Johnson, dhe një grup zyrtarësh të lartë evropianë.
Fatmirësisht, nga kjo ngjarje nuk pati viktima apo të lënduar. Pasagjerët ishin evakuuar me shpejtësi dhe në kohë, menjëherë pasi ishte zbuluar kërcënimi nga droni. Mësohet se droni goditi lokomotivën e trenit, duke shkaktuar dëme materiale, por pa pasoja për jetën e njerëzve.
Boris Johnson po largohej nga Kievi, ku kishte marrë pjesë në një konferencë ndërkombëtare. Në trenin e tij udhëtonin edhe personalitete të tjera të larta të sigurisë nga Evropa, duke përfshirë këshilltarin britanik të Sigurisë Kombëtare, Jonathan Powell, si dhe një këshilltar i Kancelarit gjerman, Friedrich Merz. Kalimi i tyre në këtë linjë hekurudhore, pak para sulmit, ka ngritur pyetje mbi shënjestrimin e mundshëm të kësaj infrastrukture.
Menjëherë pas sulmit, ish-kryeministri Johnson reagoi ashpër, duke shprehur shqetësimin e tij për shënjestrimin e një treni civil pranë kufirit me një vend anëtar të NATO-s. “Kur do t’u japim atyre mbrojtjen ajrore që u nevojitet?” – deklaroi Johnson, duke nënvizuar nevojën urgjente për sisteme mbrojtëse ajrore për Ukrainën.