Situatë alarmante me zjarret: 10 vatra aktive në vend, mobilizim masiv forcash
Shqipëria vijon të përballet me një situatë të tensionuar nga zjarret, me 10 vatra që mbeten aktive në rrethe të ndryshme të vendit. Kjo vjen pas raportimit të 25 vatrave gjithsej brenda 12 orëve të fundit, ndërsa strukturat e emergjencave civile janë angazhuar plotësisht në operacionet për lokalizimin dhe shuarjen e flakëve.
Sipas të dhënave nga Ministria e Mbrojtjes, një mobilizim i gjerë i burimeve është vënë në lëvizje. Në terren janë angazhuar 47 automjete zjarrfikëse dhe një numër prej 454 forcave operacionale. Këto veprime koordinohen nga Agjencia Kombëtare e Mbrojtjes Civile, në bashkëpunim me prefekturat, njësitë vendore dhe Forcat e Armatosura. Pjesë e ndërhyrjeve janë edhe 110 efektivë të Forcave të Armatosura, të mbështetur nga tre helikopterë dhe avioni special “Air Tractor”, si dhe mjetet zjarrfikëse të ushtrisë.
Në zonën e Dajtit, operacionet nga toka dhe ajri po vazhdojnë me intensitet, me autoritetet që konfirmojnë se aktualisht nuk ka rrezik për zonat e banuara. Po ashtu, në fshatin Priskë të Tiranës, po punohet për shuarjen e një zjarri në një sipërfaqe pyjore, pa kërcënim për banorët e zonës.
Në Mallakastër, falë ndërhyrjeve të kombinuara nga ekipet tokësore dhe ajrore, vatrat e zjarrit në zonat Riban dhe Ngraçan po shkojnë drejt izolimit të plotë. Ndërkohë, në qarkun e Elbasanit, vijojnë operacionet në Shqiponjë, malin e Dardhës, Mjekës dhe zonën e mbrojtur të malit të Valamarës. Bëhet me dije se vatrat në Shqiponjë dhe Mjekës janë nën kontroll dhe nuk paraqesin rrezik për zonat e banuara.
Një situatë shqetësuese është riaktivizimi i një vatre zjarri në Kostren 2, në bashkinë Berat, ku forcat zjarrfikëse janë angazhuar sërish për shuarjen e saj. Lajm i mirë vjen nga Korça dhe Kurbini, ku zjarret në Floq dhe në Shpërdhet–Drojë janë shuar plotësisht, duke lehtësuar disi situatën e përgjithshme në vend.