Pirro Vengu: Ligji i Investimeve Strategjike ka skaduar, nuk lidhet me çështjen e 4 milionë eurove për Kanye West
Deputeti i Partisë Socialiste, Pirro Vengu, i ftuar këtë të hënë në emisionin “Now me Erla Mëhilli” në Euronews Albanian, ka trajtuar çështjen e efektivitetit të ligjit mbi investimet strategjike. Diskutimi mori shkas nga një pyetje e moderatores Erla Mëhilli, lidhur me përdorimin e shumës prej 4 milionë eurosh për organizimin e koncertit të artistit Kanye West.
Në përgjigje të pyetjes, Vengu theksoi se ligji aktual për investimet strategjike nuk është më në fuqi dhe nuk prodhon efekte ligjore. Ai sqaroi se ky ligj e ka pasur afatin e fuqisë deri në muajin qershor dhe nuk do të rinovohet, duke e quajtur atë “një kapitull të mbyllur” dhe duke shtuar se “ai ligj nuk prodhon efekte sot”.
Deputeti socialist shtoi se Shqipëria pritet të ketë një ligj të ri për investimet strategjike, i cili do të jetë i harmonizuar plotësisht me standardet dhe rregulloret e Bashkimit Evropian. Vengu vuri në dukje se jo vetëm ky ligj, por edhe shumë akte të tjera ligjore në Shqipëri, nuk janë në përputhje të plotë me kërkesat e BE-së, fakt ky që justifikon procesin e negociatave për anëtarësim.